Zio Mario

Zio Mario

La roda gira
ma la camera d’aria no tien,
su sta strada de buse
piena de letame e fien.
La bici fa’ fadiga
e mi ancora de piu’,
che son qua’ tut suda’
co la schena brusada dal sol.
Ho tira su’ le braghe al genocio
par no sporcarme co la caena,
e la borsa sora el manubrio
se ciapa dentro i raggi.
Go’ tutte ste medicine
da portar a me sio,
che ghe ne ciapa cusi’ tante
da no starghe drio.
Non so de cos che’l sia mala’
forse no i lo sa’ nianca lu’,
ma el dottor par no sbagliarse
ghe a dito che cusi’ el se tira su’.
Me sio Mario
vecio operaio della zanussi,
l’unico trofeo che’l ga’ porta casa
le la so tuta blu,
i la tien come na reliquia
da esibir in salotto,
in occasion de qualche visita parenti.
In vita sua el ga’ monta’ oblo’ par lavatrici
el ga’ quindi na vision tonda delle robe,
i so colleghi i lo ciamava
el copernico de Porcia.
Quaranta ani de linea
quaranta de mensa,
quaranta de macchineta del caffe’,
quaranta de timbradora e
quaranta de postura a 90 gradi.
Con la liquidasion le’ anda’ in Canada
a trovar so fradel Venansio,
trenta giorni a meno trenta gradi,
l’unico volta che le usio par cior la posta
se ga’ frattura’ un polso.
All’aeroporto i voleva segarghe el ges
par veder sel portava droga,
na volta rimes pie’ in Italia
nol se ga’ piu’ mos da Topaligo.
E mi son qua’ che ghe porto su e so’ ste medicine
par el cuor, par la pression, par el diabete
e par tut el resto.
Questo le’ me sio Mario
un dei tanti che ga’ fat na vita da median,
i amici del bar i l’ha sempre scoiona’
disendo che la vita le na roda che gira
che’l cerchio poi se chiude.
Ma lu’ de suo invese,
pensa che la vita
sia come i oblo’ che’l ga’ monta’,
chi ga’ da serarse ,
sempre che la guarnision sia messa ben.

Coperton Buick