Poesia e dintorni

Cosa se pol far

Co sta' macchina sempre in riserva

che strappa ogni volta che schisso el pedal destro,

saria ora de cambiarla o de sistemarla

sta carcassa che someia alla me vita.

Co sto' pan cusi' duro che'l no fa' nianca fregole

a moio nella minestra fa' paston par tirar su' muri,

le braghe che casca insieme alle bale

me voria spago da valisa par strinser la cinta.

Cosa se pol far sentai sotto el pergol

pensando ai cassi propri chi te gira sempre intorno,

co la pansa fora a far rider i viandanti

chi ga' manco spirito de un volantin pubblicitario talla cassetta delle lettere.

L'erba d'inverno tase spettando la primavera

par alsar un fia' la cresta,

la not fredda e la brina la mattina

noi te mette nelle condision de emosionarte.

Cosa se pol far se le scarpe come el temp strinse

no lassa ne respiro ne speransa,

come se pol metter a dormir i nervi

chi tira come un mus incattivio dalle frustae.

El can me segue con sospetto

se almanco parlasse el podaria confortarme,

anca lu' pero' ga' qualcosa che ghe gira par la testa

ma che vien pi natural menar la coda.

Cosa se pol far co sto' bocal de birra

co sta camisa che no tien la piega,

la messa finisse andando in pase

me tiro su' el bavero che go freddo alla codopa.

Cosa se pol far co sto' cussin che no sta fermo

se move insieme ai sogni che me faso addoss,

doman podro' anca star meio de oggi

do man le pol anca scaldar un cuor malanda'.

Coperton B.